Cyn etholiadau’r Senedd yn 2021, mae ymgyrch dan arweiniad Maint Cymru, ac sydd yn cael ei gefnogi gan RSPB Cymru, yn galw ar bleidiau gwleidyddol i ymrwymo i bolisïau a fyddai’n gwneud Cymru yn genedl dim datgoedwigo gyntaf y byd.

Ar hyn o bryd, mae ôl troed ecolegol Cymru bum gwaith yn fwy na maint y genedl ei hun.. Mae llawer o hyn yn cael ei achosi drwy fwyta bwydydd bob dydd, sy’n cynnwys cig eidion, soi (a geir mewn porthiant anifeiliaid ar gyfer anifeiliaid sydd wedi’u magu ar gyfer cig, wyau a llaeth), olew palmwydd (sydd yn cael ei ddarganfod mewn bron hanner y cynnyrch wedi’u pecynnu yn ein harchfarchnadoedd, sy’n cynnwys bisgedi a siampŵ), cacao (sydd yn cael ei ddefnyddio i wneud siocled), a choffi.

Mae’r ymgyrch wedi cyhoeddi adroddiad “Gwneud Cymru’n Genedl Dim Datgoedwigo” sy’n amlinellu sut y gall llunwyr polisi, busnesau a sefydliadau cyhoeddus weithio gyda’i gilydd i gyflawni’r nod hwn.

Mae’r adroddiad yn cynnig deg prif argymhelliad, sy’n cynnwys cymell a chefnogi busnesau drwy Gontract Economaidd Llywodraeth Cymru i sicrhau nad yw eu cadwyni cyflenwi yn cynnwys arferion datgoedwigo, adolygu buddsoddiadau pensiwn Llywodraeth Cymru a llywodraeth leol, gwneud newidiadau i arferion ffermio a bwyd, a chreu label ‘dim datgoedwigo’ ar gyfer cynnyrch sydd yn cael eu gwneud yng Nghymru

I ddysgu mwy am yr ymgyrch a gwylio fideo o ddigwyddiad lansio’r ymgyrch, ewch i wefan Maint Cymru.