Amdano Cymru Masnach Deg

Mae Cymru Masnach Deg yn cefnogi, tyfu a hyrwyddo’r mudiad Masnach Deg yng Nghymru.

Ers 2009, rydym ni wedi ymgyrchu dros hawliau ffermwyr a chynhyrchwyr mewn gwledydd incwm isel a chanolig sydd fel arfer yn cael eu talu’n wael ac yn byw gydag effeithiau newid hinsawdd. Credwn y dylai pob ffermwr a gweithiwr, ble bynnag y maent yn byw yn y byd, dderbyn incwm byw.

Mae Cymru yn genedl fach, ond rydyn ni am chwarae ein rhan wrth greu byd gwell – yma a thu hwnt – ac yn 2008 daethom y Genedl Masnach Deg gyntaf yn y byd.

Pobl sy’n bwysig i ni, nid elw ac mae ein gweledigaeth ar gyfer byd cyfartal sy’n masnachu’n deg fel y gall pawb gynnal bywoliaeth weddus ac urddasol. Ein cenhadaeth yw gweithredu fel catalydd ar gyfer y mudiad yng Nghymru, ac ym mhopeth a wnawn, rydym yn ymdrechu i fod yn gefnogol, yn gydweithredol ac i alluogi.

Mae pobl yn ein hadnabod am ein gwybodaeth a’n barn arbenigol ynghylch Masnach Deg, cyfiawnder masnach a materion ehangach yn ymwneud â hawliau dynol, cynaliadwyedd a chydraddoldeb. Rydym yn gweithio gyda dau gorff Masnach Deg rhyngwladol – Masnach Deg Rhyngwladol a Sefydliad Masnach Deg y Byd – ac yn cefnogi dros 30 o grwpiau Masnach Deg gweithredol sy’n gweithio gyda chymunedau a sefydliadau lleol ledled Cymru. Gallwn hefyd gefnogi sefydliadau i fodloni saith Nod Llesiant y Ddeddf Llesiant Cenedlaethau’r Dyfodol (Cymru), darn arloesol o ddeddfwriaeth sy’n ei gwneud yn ofynnol i gyrff cyhoeddus weithio’n well gyda phobl, cymunedau a gyda’i gilydd, ac i atal problemau fel tlodi, anghydraddoldebau iechyd a newid hinsawdd.

Mae Cymru Masnach Deg yn gwmni bach wedi’i gyfyngu trwy warant, gyda dau aelod staff rhan-amser, gwirfoddolwyr a bwrdd o gyfarwyddwyr. Rydym yn bartner yn Hub Cymru Affrica, ac yn rhan o Fudiad Cyfiawnder Masnach y DU. Ariennir Cymru Masnach Deg gan Lywodraeth Cymru trwy’r raglen Cymru ac Affrica.

Beth rydyn ni’n gwneud

Mae gan Cymru Masnach Deg ran bwysig i’w chwarae wrth gefnogi twf y mudiad ledled Cymru a darparu cyfleoedd i gynhyrchwyr Masnach Deg yn rhyngwladol.

Rydym yn gweithio gyda dros 30 o gymunedau Masnach Deg, 200 o ysgolion, 18 awdurdod lleol ac wyth o fanwerthwyr Masnach Deg, ac yn cysylltu â grwpiau ffydd, prifysgolion a busnesau yng Nghymru bob blwyddyn. Rydym hefyd yn cydlynu ymgyrchoedd a digwyddiadau gan gynnwys pythefnos Masnach Deg a theithiau cynhyrchwyr Masnach Deg yng Nghymru. Ni hefyd yw’r unig sefydliad Masnach Deg cenedlaethol yng Nghymru sy’n cynnig adnoddau cyfrwng Cymraeg ar gyfer Cymru gyfan.

Beth hoffem ni gyflawni

Mae gan Cymru Masnach Deg tri phrif amcan; sydd i:

● Gefnogi: Creu a chefnogi gweithredwyr
● Dyfu: Creu partneriaethau a chynyddu cyfleoedd i’r eithaf
● Hyrwyddo: Cynnal a gwella ymrwymiad Llywodraeth Cymru i hyrwyddo Cymru fel Cenedl Masnach Deg

Rydyn ni’n gwneud hyn oherwydd rydyn ni’n credu ei bod hi’n bwysig bod pob cynhyrchydd a chyflenwr yn derbyn incwm byw. Darllenwch ein strategaeth gryno yma.

Dysgwch fwy am beth yr ydym yn ceisio i gyflawni o ein strategaeth 2025 i 2028:

Strategaeth Cymru Masnach Deg 2025 i 2028 Download

Cwrdd â'r tîm

Aileen Burmeister

Pennaeth Cymru Masnach Deg
Mae Aileen wedi bod yn angerddol dros Fasnach Deg o oedran ifanc, ac mae wedi bod yn ffodus i weithio i Gymru Masnach Deg am bron 10 mlynedd. Mae hi newydd ddychwelyd o secondiad gyda Llywodraeth Cymru yn edrych ar faterion ehangach ar draws cadwyni cyflenwi sy'n gysylltiedig â chyfrifoldeb byd-eang, ac mae'n edrych ymlaen at ddod â'r wybodaeth honno yn ôl i Gymru Fasnach Deg.

Hoff Gynnyrch Masnach Deg
Siocled Tywyll Tarddiad Sengl Anorchfygol gydag Oren gan y Co-op
Sarah Stone

Cynghorydd Arbenigol
Mae gyrfa Sarah wedi bod yn y trydydd sector yn bennaf, ac mae hi wedi bod yn ymwneud â chyfiawnder cymdeithasol, iechyd meddwl a materion cymunedol. Yn fwyaf diweddar, bu'n gweithio i'r Samariaid, ochr yn ochr â gwirfoddolwyr ar draws Cymru, a gyda'r llywodraeth ac asiantaethau eraill i wella polisi iechyd meddwl a mynd i'r afael ag anghydraddoldebau. Mae ganddi ddiddordeb mawr mewn adrodd straeon, ac mae hi newydd orffen MA mewn ysgrifennu creadigol.

Hoff Gynnyrch Masnach Deg
Siocled tywyll Divine gyda ffrwythau a chnau!
Millie Belding

Swyddog Cymunedol a Chyfathrebu
Fe dyfodd Millie i fyny yng nghefn gwlad Gorllewin Cymru gyda diddordeb yn gynaliadwyedd, cydraddoldeb a dylunio creadigol. Ers graddio o Ysgol Gelf a Dylunio Caerdydd yn 2022, mae Millie wedi cymryd rhan mewn nifer o brosiectau gwirfoddol ledled y byd ac wedi rheoli cynnwys cyfryngau cymdeithasol ar gyfer sefydliadau di-elw wahanol yng Nghymru.

Hoff Gynnyrch Masnach Deg
Te Masnach Deg Organig gan Clipper
Lila Haines

Cadeirydd
Ymchwilydd annibynnol ac awdur yw Lila y mae ei gyrfa wedi cynnwys newyddiaduraeth, gwleidyddiaeth a datblygiad rhyngwladol. Mae’n siarad Cymraeg, Gwyddeleg a Sbaeneg ac mae ganddi ddiddordeb arbennig mewn materion cydraddoldeb, datblygiad cynaliadwy a hanes gwleidyddol.

Hoff Gynnyrch Masnach Deg
Hufen ia - Ben & Jerry’s Karamel Sutra
Rita Singh

Is-gadeirydd
Mae gan Rita sawl blwyddyn o brofiad yn gweithio ar gynaladwyedd, gan ddod â chyfoeth o brofiad ar ddatblygiad polisi, rhwydweithio ac arwain camau gweithredu i gyflawni newid ar bolisïau datblygiad cynaliadwy yn y sectorau preifat, cyhoeddus a’r trydydd sector.

Hoff Gynnyrch Masnach Deg
Olew Olewydd ac Almonau Zaytoun
Tamsin Wallbank

Trysorydd
Gwnaeth Tamsin raddio gyda BA(Anrh.) mewn Athroniaeth ym 1996. Treuliodd sawl blwyddyn yn gweithio i fanciau amrywiol y stryd fawr cyn dychwelyd i’r brifysgol i wneud MSc mewn Busnes a TG. Ar hyn o bryd, mae Tamsin yn ystyried dysgu sut i fwyta tân a deifio yn yr awyr.

Hoff Gynnyrch Masnach Deg
Pêl rygbi’r Bala (bach a maint llawn)
Natalie Rees

Cyfarwyddwr
Arbenigwr cynaladwyedd yw Natalie gyda thros 20 o flynyddoedd o brofiad. Ar hyn o bryd mae’n gweithio gyda Thrafnidiaeth i Gymru, ac mae hefyd yn bartner mewn cwmni arlwyo feganaidd. Mae Natalie yn frwd dros Fasnach Deg, wedi iddi sefydlu ac ennill statws ar gyfer Grŵp Masnach Deg Castell-nedd Port Talbot.

Hoff Gynnyrch Masnach Deg
Tony’s Chocolonely (yn benodol dark chocolate almond sea salt)
Brân Devey

Cyfarwyddwr
Mae Brân yn gyn-weithiwr i Hub Cymru Africa (y mae Masnach Deg Cymru yn bartner iddo) ac mae bellach yn gweithio ym maes Addysg Fyd-eang. Nodweddir ei yrfa hyd yma gan angerdd am gyfathrebu, materion amgylcheddol a rhyngwladol, ymrwymiad i iechyd meddwl, a chred gref mewn cyfiawnder byd-eang ac undod.

Hoff Gynnyrch Masnach Deg
Siaced Paramo
Alex Phillips

Cyfarwyddwr
Mae Alex wedi gweithio ym maes polisi cyhoeddus yng Nghymru ers dros ddegawd gyda ffocws sylfaenol ar bolisi a deddfwriaeth amgylcheddol a datblygu cynaliadwy. Mae Alex yn angerddol am y croestoriadau rhwng cynaliadwyedd amgylcheddol a chymdeithasol/diwylliannol, yn enwedig o fewn y system fwyd.

Hoff Gynnyrch Masnach Deg
Popeth Masnach Deg o Greggs
Trish Goodbody

Cadwr Llyfrau
Mae Trish wedi gweithio fel cadwr llyfrau am dros 20 mlynedd ac mae hi'n mwynhau dramâu trosedd a gwylio tenis ar y teledu.

Hoff Gynnyrch Masnach Deg
Coffi Rhost Organig Masnach Deg Clipper
Craig ab Iago

Cyfarwyddwr
Mae Craig yn Gymro angerddol sydd wedi treulio'r 30 mlynedd diwethaf yn archwilio ffurfiau gwahanol o hyrwyddo cyfiawnder cymdeithasol, economaidd ac amgylcheddol. Ei fynegiant diweddaraf o'r ymrwymiad yma yw trwy ei rôl fel gwleidydd lleol yng Ngwynedd.

Hoff Gynnyrch Masnach Deg
Poblado Coffi
Ffion Dean

Cyfarwyddwr
Mae gyrfa Ffion wedi canolbwyntio ar faterion cyfiawnder cymdeithasol. Bu’n gweithio'n flaenorol yn y sector elusennol, gan gynnwys yn CAFOD (un o sylfaenwyr y Sefydliad Masnach Deg). Ar hyn o bryd, mae’n gweithio yn y mudiad undebau llafur lle mae hi’n arwain gwaith cyfathrebu ac ymgyrchoedd TUC Cymru. Mae hi hefyd yn gantores a dawnswraig werin brwdfrydig.

Hoff Gynnyrch Masnach Deg
Siocled Tywyll 70% o Green and Black’s